Bloggsvæði Blöndals

HVERSU LENGI?

Sun, 06 Jan 2008 00:02:22 GMT

HVERSU LENGI?

Hversu lengi er hollt að tiltekinn stjórnmálaflokkur sé við völd, einn saman eða í samsteypustjórn? Kynni nú einhver að reka upp ramakvein og mótmæla ofstæki og aðför að lýðræðinu. Hversu lengi er æskilegt að þingmaður sitji á þingi? Á að meta starfsreynslu og þroska eða heimta örari nýliðun til að koma í veg fyrir hugmyndafræðilega stöðnun? Reyndar er ekkert samband milli stöðnunar og aldurs. Hvaða mannvitsbrekka úrskurðar um slíkt? Vonandi þjóðin. Jöfn aldursdreifing þingmanna er nauðsynleg svo óreyndir menn, ungir, hrapi ekki að ógæfuverkum í lagasetningu vegna skammsýni og fáfræði. Hvað sem prófgráðum lítur er ekki bein í nefi þess manns sem ekki ber í sér snefil af mannlegri skynsemi og samúð í garð þess er minna má sín. Þing lögmanna tryggir ekki endilega besta réttarfarið fremur en þing eintómra lækna tryggir besta heiulbrigðiskerfið. Hversu lengi og hversu oft er þingmanni hollt að vera ráðherra? Hversu lengi ætti hæstaréttardómara að líðast að sitja í dómarasæti? Vega slíkar spurningar að atvinnufrelsi og mannréttindum? Mér býður í grun að fremur sé þörf á þessum takmörkunum en skerðingu á starfstíma forsetans. Þó kynni að leynast eftirlaunasparnaður í slíkum takmörkunum.

Hversu lengi á forseti Íslands að skipa embætti sitt? Ólafur Ragnar Grímsson forseti Íslands býður enn starfskrafta sína. Hann er fimmti forseti lýðveldisins. Ólafur var fyrst kosinn forseti árið 1996. Enginn vafi er á því að forsetinn nær kjöri í sumar og verður þá þriðji forsetinn sem situr í 16 ár, eða fjögur kjörtímabil. Ásgeir Ásgeirsson og Vigdís Finnbogadóttir sátu hvort um sig á forsetastóli í 16 ár.

Forsetar lýðveldisins: Sveinn Sveinn Björnsson, 1944-1952; Ásgeir Ásgeirsson, 1952-1968; Kristján Eldjárn, 1968-1980 ; Vigdís Finnbogadóttir, 1980-1996 og Ólafur Ragnar Grímsson, fimmti forseti lýðveldisins, kjörinn árið 1996 og tók við embætti 1. ágúst það sama ár. Hann var endurkjörinn árið 2000 og einnig árið 2004.

Ekki er óumdeilt hversu lengi forseti eigi að geta gegnt embættinu. Formaður vinstri grænna hefur viðrað þá hugmynd að breyta stjórnarskránni á þá leið að forseti geti gegnt embættinu að hámarki í 12 ár eins og Finnar hafi gert. Fleiri á vettvangi stjórnmálanna hafa tekið í sama streng en gert betur og sagt nauðsynlegt að skýra ákvæði um forsetaembættið.

Öðru hverju rumska menn og spyrja eðlilegt sé að binda þann tíma sem hver og einn getur gegnt embætti forseta. Mér þótti einkar athyglivert að sá sem nú hreyfir málinu, Steingrímur J. Sigfússon, hefur líklega setið á þingi um 25 ár á þingi. Hversu lengi er eðlilegt að menn ( allar konur eru menn – þó ekki séu allir menn konur) gegni þingmennsku?

Íslenzk tunga: Maður af erlendu bergi brotinn, sem hlotið hefur íslenzkan ríkisborgararétt og uppfyllir almenn skilyrði framboðs til embættis forseta Íslands má bjóða sig fram til embættisins. Engar reglur gilda um íslenzkukunnáttu forsetans. Þessu þarf að breyta.

Virðing: Þannig háttar til á Íslandi að sérhver hlaupastrákur eða hlaupastelpa geta rokið upp með skætingi um forsetaembættið og handhafa þess og ekki að sjá að í mót komi nokkur viðurlög gegn slíkum dónaskap. Það er löngu tímabært að setja í lög ákávæði um almenna kurteisi og tillhýðilega virðingu fyrir forseta og alþingi. Slíkt þarf hvorki að vera brot á tjáningar- né ritfrelsi. Afstaða mín í forsetakjörum er aukaatriði.

Neitunarvald forsetans: Sumir segja forsetaembættið vera leifar af konungsveldinu og fýla grön. Meirihlutinn ræður og meirihluti þjóðarinnar vill forseta. Forsetaembættið skartar ekki pólitískum völdum utan varnagla skv. 26 gr. stjórnarskrárinnar: ,,Ef Alþingi hefur samþykkt lagafrumvarp, skal það lagt fyrir forseta lýðveldisins til staðfestingar eigi síðar en tveim vikum eftir að það var samþykkt, og veitir staðfestingin því lagagildi. Nú synjar forseti lagafrumvarpi staðfestingar, og fær það þó engu að síður lagagildi, en leggja skal það þá svo fljótt sem kostur er undir atkvæði allra kosningabærra manna í landinu til samþykktar eða synjunar með leynilegri atkvæðagreiðslu. Lögin falla úr gildi, ef samþykkis er synjað, en ella halda þau gildi sínu.” Merkilegt að ónefndir þingmenn vildu snúa útúr þessu stjórnarskrárákvæði og helst afnema það þegar núverandi forseti beitti því fyrstur manna gegn meingölluðu fjölmiðlafrumvarpi. Ástæðan var pólitísk og beindist gegn forsetanum sjálfum.

Ögn um forsetana: Forsetaembættið er sameiningartákn þjóðarinnar. Forsetinn kemur fram fyrir hönd þjóðar sinnar og er þessvegna spegill hennar útávið. Íslendingar hafa skartað glæsilegum forsetum á hverjum tíma.

Sveinn Björnsson er fyrir mitt minni, en ég man glöggt eftir Ásgeiri Ásgeirssyni, þá ungur drengur, og sá hann oft í gömlu sundlaugunum og vissi að hann var forseti Íslands. Mér þótti hann hátíðlegur. Margir viku sér að Ásgeiri og spjölluðu við hann um daginn og veginn og honum lá aldrei á.

Ég man glöggt eftir framboði Kristjáns Eldjárns. Þrátt fyrir rokkbylgju og sítt hár var augljóst að hann var þjóðarval; hæglátur og vandaður fræðimaður, alþýðlegur og virtist feiminn. Ég hreifst af málfari hans og framkomu. Frú Halldóra, kona Kristjáns, var í mínum huga móðurleg kona bauð af sér besta þokka. Kjör Vigdísar Finnbogadóttur er engu síður minnisstætt. Hún var á undan sinni samtíð í umhverfismálum og gróðurvernd. Hún gerðist eiðsvarinn málsvari íslenzkrar tungu, vel menntuð heimskona og glæsleg. Nokkuð blés um framboð Ólafs Ragnars, enda harðsvíraður á vinstri væng stjórnmálanna. Þær raddir eru að mestu þagnaðar þó enn gjammi hundar á afskektum öfgabýlum stjórnmálanna. Enginn frýr Ólafi vits né mælsku enda nýtur hann mikillar virðingar þó fremur heiman en heima. Forsetinn of kona hans hafa opnað hvers kyns viðskiptum og listum braut erlendis. Þau eru óvart í framlínu útrásarinnar frægu. Líklega áttar þjóðin sig ekki á mikilvægi Ólafs fyrr en hann er allur. Það er ekkert nýtt.

6. jan. 2008 - Haraldur G. Blöndal

Bubbi -

Fri, 17 Aug 2007 22:54:22 GMT

Bubbi

Bubbi er þjóðareign, umdeildur, elskaður og hataður. Hann kom fram á Kaupþingskonset í gærkvöld og sannaði enn og aftur þungaviktarvægi sitt.

Bubbi hóf ferilinn Utangarðs og er fyrsti heiðurþór í uppsafni stórsveitarinnar "Enfant Terrible,, sem verður um eilífð talin Einherjar og brókarskelfar íslenzkrar rokksögu meðan land byggist og lífsandi bærist í brjóstum vorum.

Lög og textar Bubba eru runnin okkur í merg og bein. Að þessu leyti er hann Davíð Stefánsson okkar tíma.

Honum er legið á hálsi af ýmsum fyrir að svelta ekki með sælubrosi við list sína einsog verið hefur þjóðarsiður frá landnámi. Bókvitið verður ekki í askana látið sagði alþýðuspekin og þjóðin hélt áfram í striti sínu afþví annað var ekki í boði.

Ég tek hins vegar ofan fyrir Bubba fyrir að hasla sér völl og afkomu með list sinni einsog listamanni ber. Hælbítar hans verða löngu gleymdir þegar listaspírur nýrra tíma hylla Bubba og baráttu hans um virðingu fyrir sköpuninni og mannsæmandi lífskjörum þeirra sem yrkja þann akur.

Stórfyrirtæki hafa fjárfest í Bubba. Hann auglýsir og fær greitt fyrir - fær greitt fyrir tónlist sína og texta. En Bubbi lætur vaða og hefur aldrei þegið greiðslu fyrir að halda kjafti þegar kemur að pólitík. Þar er hann sjálfum sér trúr að vanda.

Öfgalaust

Sun, 11 Mar 2007 15:33:11 GMT

Tólf ára stjórnarsamstarf Sjálfstæðs og Framsóknar er senn á enda. Þjóðfélagið er umbylt. Sókarfæri og sigrar íslenzkra fyrirtækja erlendis sanna það. Fyrr á öldum þegar strit og fátækt voru eina björg þjóðarinnar í harðbýlu og naumgæfu landi gilti málshátturinn ,,bókvitið verður ekki í askana látið”. Það er liðin tíð.

Með aukinni menntun skapast verðmætari störf og fyrirtæki eiga kost á leggja í víking. Hagnaður er ekki lengur ljótt orð. Hagnaður er forsenda framsóknar og vaxtar. Hann styrkir fyrirtækin í sessi og tryggir afkomu og vöxt. Íslendingar lifa hver af öðrum engu síður en aðrar þjóðir.

Einu sinni var það eitt mesta hugsjónastarf sem hugast gat í kaupmannastétt að selja íslendingum í sig og á. Það er liðin tíð. Af rekstri líkra fyrirtækja eru risin stórveldi Hver hefði trúað því að af slíkum grunni myndi upp rísa stórveldi sem hefur haslað sér völl á ,,High Street” í London?

Sumir hafa það betra en aðrir. Það er ekki nýmæli í veraldarsögunni. Þeir sem búa við lakari kjörin á Íslandi eru þó betur settir en erlendis. En velferðarríkinu er það engin afsökun og kjör þessa fólks þarf enn að bæta.

Aldraðir, öryrkjar og sjúklingar skefjalausan rétt á mannsæmandi lífskjörum. Því miður er þó svo að í skjól örorku og sjúkdóma skríður margur undir fölsku flaggi. Slíkt spillir góðum málstað auk þess að minnka það sem sannir rétthafar þessa fjár ættu með fullum rétti að njóta.

Góð grein

Sat, 10 Mar 2007 20:47:26 GMT

Vek athygli á skrifum Jörundar Ragnars um bíla og umferðarmál:

http://blog.central.is/jorundur

Pólitík

Sat, 10 Mar 2007 20:44:23 GMT

Engir pistlar hafa birtst um langa hríð vegna anna. Nú líður að kosningum og tími til kominn að reiða fram stílvopnið.

Sú undarlega staða er upp komin að íslenzkar konur eru á flótta frá Sjálfstæðisflokki yfir til Steingríms J. Sigfússonar og Vinstri grænna. Samfylkingin missir fylgi jafnt og þétt. Sjálfstæðisflokkur rétt heldur sjó

Fróðlegt verður að fylgjast með fjölmiðlum á næstunni. Morgunblaðið hefur staðið sig sæmilega í hlutlausum fréttaflutningi af hinum pólitíska vettvangi.

Sumarleyfi.

Fri, 08 Sep 2006 18:15:30 GMT

Öll skrif hafa legið niðri vegna sumarleyfa.

Von er á frásögn af tónleikum Rolling Stons í London, 20. ágúst sl.

Ég vek athygli á sköruglegri og skilmerkilegri grein Jörundar Ragnars um Árna Johnsen og Sjálfstæðisflokkinn: http://www.blog.central.is/jorundur?page=news

Fleirra innan skamms.

Steinn í götu

Fri, 11 Aug 2006 08:56:48 GMT

Tvö áföll höfðu dunið yfir. Keith Richards féll úr trénu og þurfti að tappa blóði af heilanum, Ron Wood fór í aftöppun vegna hraustlegrar drykkju og nú síðast lýstu bresk yfirvöld neyðarástandi á flugvöllum landsins og öryggisgæzla er í hámarki. Enginn má fara um borð með vökva á pytlu, gleraugu mega aðeins vera á nefi manna eða höfði, lykillinn að bílnum mínum ógnar örygginu þar eð hann er með fjarstýringu og handtösku undir nærtækustu smálegheit einsog veski, vegabréf og myndavél að ekki sé nú minnst á síma eru harðbönnuð. Varla má vera með neitt í vösunum og varla að fara megi með bók eða brauð um borð. Allt um það - Bjarmalandsför verður farin einsog skrifað var í stjörnurnar og látið vaða. Enginn verður óbarinn biskup. Per ardua ad astra einsog rómverjinn sagði.

Enn af veðri

Wed, 09 Aug 2006 15:16:04 GMT

Nú er nánast útséð um að karlpeningurinn geti stundað augnbotnaæfingar að einhverju gagni þetta sumarið. Sólarleysið er nánast algert og rétt að bregði í skyndiglennur einsog til að minna mann á ótíðina. Auk þess ég vil að lagið ,,Veðurfræðingar" verði gert að hátíðarsöng Íslendinga. SJÁ SKOÐANAKÖNNUN.

Veður

Wed, 09 Aug 2006 11:49:41 GMT

Undarleg er sú skömmtunarfræði veðurfræðinganna að úthluta einum dagi hálfþurum og þeim næsta hálfrökum. Mikið væri óskandi að á þetta kækist einhvert jafnvægi. Þó ekki væri nema fyrir sálina. Ég ræddi við lækni í morgun um þessi mál. Hann sagði ótvírætt að slakar veðurspár og horfur legðust á sinni manna og vissulega væri spurning hvort ætti að draga veðurfræðingana til ábyrgðar. Ég vill raunar skipta um starfsheiti á þessum mönnum. Framvegis skuli ,,veðurfræðingar" bera starfsheitið ,,veðurspámenn". Mér datt þetta (sisona) í hug.

Rolling Stones

Wed, 09 Aug 2006 11:46:01 GMT

Óðum styttist í rokkveizluna miklu. Steinarnir hafa oltið um Evrópu þvera og endilanga að undanförnu og nálgast nú heimalandið. Æfingabúðir opna um helgina og þá verður Stonsað 24/7 einsog heilsan endist. Sandra ákvað að eiga afmæli um helgina í tilefni tónleikaferðarinnar og ætlar að grilla rokkborgara oní liðið. Ástandið verður þess konar að menn verða að vísu ekki ekki Stoned en amk Rolling.

Heimavinna

Wed, 09 Aug 2006 11:42:53 GMT

Verzlunarmannahelgin fór í heimavinnu. Verið er að reisa sólpall við kotið og fékkst tl verksins harðsnúinn verkstjóri og afarslyngur verkmaður að auki. Við kláruðuðum að ganga frá dregurum og steypa undirstöður og staura fyrir millivegg. Aðalmaður og primus motor þessa verks er og verður Jörundur Ragnar. Félagi Hörður kom sterkur inn í erfið og seinleg verkefni með jötunafli og einbeittum sigurvilja. Þetta var einkum áberandi í síðasta verkþættinum á mánudag. Heiður heill og þökk sé þeim.

Plata ágústmánaðar

Wed, 02 Aug 2006 15:20:35 GMT

Bogomil og Flint. Lagið ,,Veðurfræðingar" bjargaði andlegum status mínum þetta sumarið. Lagið ,,Perlur fyrir svín" er hárbeitt þjóðfélagsádeila. Hljóðfæraleikurinn er þéttur og sindrandi af gleði og fjöri. Útsetningarnar fimlega slungnar og koma oft á óvart. Áherzlur orða eru ekki alltaf í samræmi við íslenzka tungu, en þar gildir sú regla að áherzlan er á fyrsta atkvæði. Við aðra hlustun flokkaði ég þetta undir listrænt frávik og við þriðju hlustun var ég búinn að steingleyma þessu. Hverju? Jæja.......... Áfram með smérið;

Eitt er víst, Bomil er hreinn snillingur og kalypsoinn hreyfir jafnvel við dauðum manni. Gæðaskífa og ætti að vera í plötusafni allra sem hafa snefil af skopskyni. Skyldu veðurfræðingar spila veðurfræðingalagið í heimateitum?

Mér datt þetta bara (sisona ) í hug.

Tónleikar Unsound

Wed, 02 Aug 2006 15:10:19 GMT

Seinustu tónleikar Unsound á Íslandi þetta árið verða í miðvikudagskvöldið 2. ágúst 2006. Ég heyrði prógrammið á laugardagskvöldið og undraðist mest breiddina í tónlistinni og alltumvefjandi hljómafoss í sumum laganna. Von er á smáskífu frá Unsound á árinu.

Rolling Stones

Wed, 02 Aug 2006 15:06:44 GMT

Óðum styttist í Bjarmalandsför undirritaðs á tónleika með Rolling Stones. Richards er í þrælgóðu formi og Wodds ferskur og afvatnaður. Ítarlega verður sagt frá þessari för er á líður og nær dregur. Þessi ferð er styrkt af Landbúnaðarráðuneytinu og farin með blessun þess. Stones-kvöld er fyrirhugað á næstunni.

Rock On - Roll ON.

Strætó

Wed, 02 Aug 2006 15:01:44 GMT

Grátleg er auglýsingin aftan á strætisvögnunum; ,,Hlauptu í vinnuna". Það vantar aðeins eina línu þar fyrir neðan. ÞÚ GETUR HVORT EÐ ER EKKI TREYST Á STRÆTÓ.

Tæki ég strætó í mínu hverfi (sem hvarflar ekki að mér) fer hann ekki með mig í Mjóddina sem er þó aðalskiptistöðin heldur í Smáralind. Þar má´farþeginn hanga skjóllaus eftir vagni ofaní bæ. Ég spyr. Er ekki allt í lagi?